កំពត៖ ស្នងការដ្ឋាននគរបាលខេត្តកំពត បានបញ្ជាក់ថា អាជ្ញាធរបានឃាត់ខ្លួនលោកអភិបាលរងក្រុងបូកគោ លោក គឹម បញ្ញា ក្រោយពីបានអំពើហិង្សាលើប្រពន្ធ និងបានកសាងសំណុំរឿងយកទៅដោះស្រាយតាមនីតិវិធីច្បាប់។
កាលពីថ្ងៃទី២៥ ខែមេសា ឆ្នាំ២០២៣ ស្នងការដ្ឋាននគរបាលខេត្តកំពត បានអញ្ជើញលោកអភិបាលរងក្រុងបូកគោមកបំភ្លឺជុំវិញការប្រើអំពើហិង្សាលើប្រពន្ធជាច្រើនដង។ ស្នងការបានបញ្ជាក់ថា ក្រោយពីសាកសួរបំភ្លឺ ហើយទទួលបានបណ្តឹងពីភរិយាលោក គឹម បញ្ញា សមត្ថកិច្ចបានគោលការណ៍ទៅអភិបាលខេត្តកំពតលោក ម៉ៅ ធនិន និងទទួលបានគោលការណ៍ណែនាំពីព្រះរាជអាជ្ញាទើបសម្រេចឃាត់ខ្លួនលោក គឹម បញ្ញា ដើម្បីបន្តនិតិវិធីទៅតុលាការ។
ជនរងគ្រោះកាលពីថ្ងៃទី២៥ ខែមេសា បានបង្ហោះសារ និងវីដេអូរៀបរាប់ពីការឈឺចាប់របស់ខ្លួនដោយសារតែប្តីដែលជាអភិបាលរងក្រុងបូកគោតែងតែងបានវាយដុំធាក់នាង បើទោះបីកន្លងមកអាជ្ញាធរធ្លាប់បានហៅធ្វើកិច្ចសន្យាក៏ដោយ។
ជនរងគ្រោះបានរៀបរាប់ដូច្នេះថា៖«នាងខ្ញុំបានរួមរស់នៅជាមួយគ្នាតាំងពី២០១៩ ដែលនៅក្នុងអំឡុងពេលរួមរស់ នៅជាមួយគាត់នាងខ្ញុំ មិនដែលបានទទួលការស្រលាញ់ មានតែការឈឺចាប់ទាំងរាងកាយ នឹងផ្លូវចិត្ត គាត់បានប្រើអំពើហិង្សា ដាក់នាងខ្ញុំ ម្តងហើយម្តងទៀត ទាំងដែល គាត់ធ្លាប់ ធ្វើកិច្ចសន្យា ថាគាត់ឈប់ប្រើអំពើហឹង្សា ដាក់នាងខ្ញុំទៀតហើយ តែគាត់នៅតែបន្តវាយដំរូបនាងខ្ញុំ មករហូត រហូតមកដល់ពេលនេះ នាងខ្ញុំ ឆ្អែត នឹងទង្វើដែល គាត់បានធ្វើមកកាន់នាងខ្ញុំ នឹងអស់ការទ្រាំបន្តទៀត»៕
